ڕۆژی یەکشەممە دابەشکردنی مووچەی مانگی ئایار دەستپێدەکات

ئاڤا نیوز

 

وەزارەتی دارایی و ئابووری هەرێمی کوردستان ڕایگەیاند، سبەی دابەشکردنی مووچەی مانگی ئایار دەست پێ دەکات، دەشڵێت دوای گەیشتنی تەمویل لەلایەن وەزارەتی دارایی حکومەتی فیدراڵەوە، ڕاستەوخۆ خشتەی مووچە ڕادەگەیێنرێت.

ئەوەی پێویستە بیزانیت: ڕۆژی پێنجشەممە 06-06-2024، وەزارەتی دارایی عێراق مووچەی مانگی ئایاری بەشێک لە مووچەخۆرانی هەرێمی کوردستانی ڕەوانەکرد.

ڕاگەیێنراوی فەرمی: وەزارەتی دارایی و ئابووریی هەرێمی کوردستان ڕایگەیاند: دوای گەیشتنی بڕی 107 ملیار دینار لەلایەن وەزارەتی دارایی عێراقەوە بۆ سەر هەژماری بانکی وەزارەتی دارایی، ڕۆژی یەکشەممە 09-06-2024، مووچەی مانگی ئایاری خانەنشینانی مەدەنی و کەسوکاری شەهیدان و ئەنفالکراوان و خاوەن پێداویستییە تایبەتەکان، دابەش دەکرێت.

زانیاریی زیاتر: وەزارەتەکە ئاماژەی بەوەش داوە، دوای گەیشتنی تەمویلی وەزارەت و دام و دەزگاکانی تر لەلایەن وەزارەتی دارایی حکومەتی فیدراڵەوە، ڕاستەوخۆ خشتەی مووچەی ئەو دام و دەزگایانەش ڕادەگەیێنرێت.

لە لایەکی دیکەوە: پێشەوا هەورامانی، گوتەبێژی حکومەتی هەرێمی کوردستان بە ئاڤا نیوزی ڕاگەیاند: پێش جەژن مووچەی سەرجەم فەرمانبەران دابەش دەکرێت بە هێزە ئەمنییەکانیشەوە.

گۆشەیەکی دیکەی دیمەنەکە: بڕیارە لەم هەفتەیەدا بەغدا مووچەی مانگی نیسانی هێزە ئەمنییەکان بنێرێت، بۆ لیستی مانگی ئایاری هێزە ئەمنییەکانیش ڕێککەوتن لەنێوان هەولێر و بەغدا دەکرێت.