لە هەڵبژاردنی ئێران قالیباف پشتیوانی لە جەلیلی دەکات

ئاڤا نیوز

محەمەد باقر قالیباف، بەربژێری خولی یەکەمی هەڵبژاردنی سەرۆککۆماری ئێران ڕایگەیاند لە خولی دووەمدا پشتیوانی لە سەعید جەلیلی دەکات.

وێنە گەورەکە: قالیباف و جەلیلی سەر بە بەرەی نەریتخوازەکانن، لە بەرامبەردا مەسعود پزیشکیان کە زۆرترین دەنگی هێنا، سەر بە بەرەی ڕیفۆرمخوازەکانە.

زانیاریی زیاتر: لە خولی یەکەمی هەڵبژاردندا پزشکیان 42٪، جەلیلی 38٪ و قالیباف 13٪ـی دەنگەکانیان بەدەستهێنا، بەهۆی ئەوەی  هیچ یەکێکیان نەیتوانی لە سەدا 50+1ی دەنگەکان بهێنێت هەڵبژاردن کەوتە خولی دووەم.

ئەوەی پێویستە بیزانیت: لە خولی یەکەمی هەڵبژاردنەکاندا قالباف ڕەتی کردەوە لە بەرژەوەندیی جەلیلی بکشێتەوە. 

قووڵتر: ئەگەر ڕێژەی بەشداریی هەڵبژاردن لە خولی دووەمدا کە بڕیارە ئەم هەینییە بکرێت هاوشێوەی خولی یەکەم بێت، ئەگەری بردنەوەی هەڵبژاردن لەلایەن جەلیلی بەهێزترە، چونکە دەنگەکانی محەممەد باقر قالیبافیش بۆ ئەو دەچن، بەمپێیە ژمارەی دەنگەکانی جەلیلی لە نیوە تێدەپەڕن.