خەزعەلی یەكەم پەیامی دوای هێرشەكەی بەغدا ڕاگەیاند

ئاڤا دیجیتاڵ

 فەرماندەی عەسائیبی ئەهلی حەق لەبارەی هێرشەكەی ئەمریكا هاتە دەنگ، دەڵێت "پێویستە توانای بەرگریی عێراق بەهێز بكرێت و لە ئەنجوومەنی ئاسایش داوای چوونە دەرەوەی بەپەلەی هێزەكانی ئەمریكا بكات".

 

ئەوەی پێویستە بیزانیت: درەنگانی شەوی ڕابردوو، هێرشێکی درۆنی کرایە سەر ئۆتۆمبێلێک لە بەغدا، فەرماندەیەكی  گرووپەكانی نزیك لە ئێران بەناوی " ئەبو باقر ساعیدی" كوژرا.

زانیاری زیاتر: قەیس خەزعەلی لە تۆڕی كۆمەڵایەتی ئێكس نوسیویەتی " ئیتر سەركۆنەكردن بەس نییە، پێویستە عێراق داواكارییەكی فەرمی پێشكەش بە ئەنجوومەنی ئاسایشی نەتەوە یەكگرتووەكان بكات و داوای كشانەوەی خێرای هێزە بیانییەكان بكات".

ئەمینداری گشتی عەسائیب ئەهلی حەق دەشڵێت " درێژەدان بە هێرشەكانی ئەمریكا پێشێلكردنی سەروەری وڵاتەكەمانە و بەڵگەی بێڕێزی ئەمریكایە بۆ حكومەت و گەلی عێراق ، هێرشەكانی ئەمریكا بەردەوامن سەرەڕای هەنگاوە ئەرێنییەكانی حكومەتی عێراق و پابەندبوونی گرووپە چەكدارەكان بۆ هێوركردنەوەی دۆخەكە". 

 

 لەلایەكی دیكەوە: بەرپرسێكی باڵای ئەمریكا بە دەنگی ئەمریكای ڕاگەیاندووە "ئۆپەراسیۆنێكمان لە بەغدا بۆ كوشتنی سەركردەیەكی باڵای گرووپە چەكدارەكان ئەنجامدا كە بەرپرسیارێتی گەورەی هەبووە". ئەو بەرپرسەی ئەمریكا گوتوویەتی "نێچیرێكی بەهادارمان بەئامانج گرتووە".