ڕەتکردنەوەی داواکاریی ڤیزای شنگن سێ هێندە زیادی کردووە

ئاڤا نیوز

یەکێتیی ئەوروپا سیاسەتەکانی سەبارەت بە کۆچبەران تووندتر کردووە، لەو چوارچێوەیەشدا ڕەتکردنەوەی داواکاریی وەرگرتنی ڤیزای شنگن زیاتر بووە.

وێنە گەورەکە: لە ساڵی 2023ـدا نزیکەی 16٪ـی داواکارییەکانی وەرگرتنی ڤیزای شنگن ڕەتکراونەتەوە. ئەم ڕێژەیە بەرامبەر بە ساڵی 2014 زیاتر لە سێ هێندە زیادی کردووە، کە ئەو کات تەنیا 5٪ بووە. 

ئەوەی پێویستە بیزانیت: ڕەتکردنەوەی ئەم داواکارییانە لە کاتێکدایە، داواکارییەکە بە خۆڕایی نییە، بەڵکو خوازیاران دەبێت لە بەرامبەر داواکارییەکەدا لانیکەم 90 یۆرۆ بدەن. هاوکات، ساڵی 2024 تێچووی داوکاریی ڤیزای شنگن 12٪ زیاد کراوە.

باكگراوند: لە ساڵی 2023ـدا لە سەرتاسەری وڵاتانی جیهانەوە 10 ملیۆن داواکاریی وەرگرتنی ڤیزای شینگن پێشکەش کراوە. بەشی زۆری داواکارییە ڕەتکراوەکان لە وڵاتانی کیشوەری ئەفریقا بوون.