مەسرور بارزانی: ساڵی 2022 یەکێتی ڕێگربوو هەڵبژاردن بکرێت

ئاڤا نیوز

 

مەسرور بارزانی لە چاوپێکەوتنێکی تایبەتدا لەگەڵ ئاڤا میدیا باسی هۆکاری دواکەوتنی هەڵبژاردنی خولی شەشەمی پەرلەمانی کوردستان ئاشکرا دەکات بۆ ماوەی دوو ساڵ و دەڵێت: "یەکێتی ڕێگربوو، ئەوکات دۆخیان نالەبار بوو و دەیانگوت نا‌‌هێڵین سندووقی دەنگدان لە سلێمانی دابنرێت".

وێنە گەورەکە: مەسرور بارزانی هەم وەک سەرۆکی حکومەت و هەم وەک جێگری سەرۆکی پارتی، لە ساڵانی ڕابردوودا بەردەوام جەختی لەسەر ئەوە دەکردەوە هەڵبژاردن لەکاتی خۆیدا بکرێت و دوانەخرێت، لەمبارەیەوە زۆر بە ڕاشکاوانە وەڵامی پرسیاری ئاڤا میدیا دەداتەوە.

لێدوانی فەرمی: سەرۆکوەزیران مەسرور بارزانی دەڵێت: "ساڵی 2022 دەبوو هەڵبژاردن بکرێت، بەڵام ئەو سەردەمە یەکێتی لە دۆخێکی نالەباردابوو، ئەوان داوایان دەکرد هەڵبژاردن دوابخرێت. کە داکۆکیش دەکرا لەسەر ئەنجامدانی هەڵبژاردن، دەیانگوت لێناگەڕێین سندووقی دەنگدان لە سنووری سلێمانی دابنرێت".

لەلایەکی دیکەوە: لەبارەی دروشمی بەشێک لە  لایەنە سیاسییەکان بەتایبەت یەکێتی کە پێکهێنەرێکی سەرەکی حکومەتە و یەکێک لە دروشمەکانی دەڵێ "کۆتایی پێدەهێنین"، مەسرور بارزانی دەڵێت: "دروشمێکی زۆر نابەجێیە لەوەی کۆتایی بە چی دەهێنن؟ خۆیان هاوبەش بوون لە حکومەت، خۆیان هاووڵاتی ئەم نیشتمانەن. پێشتریش هەوڵیان داوە کۆتایی پێبهێنن، ئەگەر ڕاستیت دەوێت کۆتایی بە قەوارەی هەرێمی کوردستان دەهێنن، دەیانەوێت کۆتایی بە شکۆی پێشمەرگە بهێنن، دەیانەوێت کۆتایی بە ئابووریی سەربەخۆی کوردستان بهێنن، دەیانەوێت کۆتایی بە پێشکەوتن و ڕیفۆرم و چاکسازی بهێنن، دەیانەوێ کۆتایی بە ڕووبەڕووبوونەوەی گەندەڵی بهێنن.. ئەگەر ئەمەیە بەرنامەیان و بڵێن کۆتایی پێدەهێنن؟ ئێمەش دەڵێین ناتوانن، ئێمەش دەڵێین ئێمە بەرگریی لەو قەوارەیە دەکەین و پێشی دەخەین و بەرەو پێشەوەی دەبەین، ڕۆژ بە ڕۆژیش ئینشائەڵڵا کوردستان ئاوەدانتر دەکەینەوە".