ئیسرائیل بەرپرسێکی پلە باڵای حیزبوڵڵا لە سووریا دەکوژێت

ئاڤا نیوز

 

بەرپرسێکی وەزارەتی بەرگریی ئەمریکا کوژرانی بەرپرسێکی پلە باڵای حیزبوڵڵای لوبنانی لە هێرشێکی ئیسرائیل بۆ سەر سووریا ئاشکرا دەکات.

 

وێنە گەورەکە: ئیسرائیل بەردەوامە لە بە ئامانجگرتنی سەرکردە و بەرپرسە پلە باڵاکانی حیزبوڵڵا لە خاکی لوبنان و سووریا، تاوەکو ئێستاش چەندین سەرکردەو بەپرسی پلە باڵای ئەو حیزبەی کوشتوون، دواترینیان کوشتنی بەرپرسی ڕاگەیاندنی حیزبوڵڵا بوو لە لوبنان.

 

زانیاریی بەدەستهاتوو: بەپێی هەواڵی ئاژانسەکانی ئەمریکا لەسەر زاری بەرپرسێک لە وەزارەتی بەرگریی ئەمریکا ئەوەی ئاشکرا کردووە، لە هێرشێکی ئەم دواییەی ئیسرائیل بۆ سەر سووریا یەکێک لە بەرپرسە پلە باڵاکانی حیزبوڵڵا کوژراوە.

 

زانیاریی زیاتر: بەپێی سەرچاوەکانی کەناڵی CNNی ئەمریکی، هێرشەکەی ئیسرائیل لە سووریا بۆ بە ئامانجگرتنی "عەلی موسا دەقدوق" بووە، بەرپرس بووە لە دانانی پلانی هێرشکردن بۆ سەر هێزەکانی ئەمریکا لە عێراق، پێش کشانەوەیان لە ساڵی 2011.

 

لە هەمان کاتدا: بەپێی هەواڵێکی ئاژانسی هەواڵی سووریا، دوایین هێرشی ئیسرائیل بۆ سەر سووریا دوو ڕۆژ لەمەوبەر بووە، لە هێرشەکەدا ژمارەیەک باڵەخانە لە شاری تەدمور لە سووریا کراونەتە ئامانج و بەهۆیەوە 30 کەس کوژراون و زیاتر لە 50 کەسیش بریندار بوونە.