شێخ دارا: بارانبارین تا ڕۆژی چوارشەممە بەردەوام دەبێت

ئاڤا نیوز

 

شێخ دارا، شارەزای كەشناسی ڕایدەگەیەنێت، هەرێمی كوردستان لە یەك كاتدا كەوتووەتە ژێر كاریگەریی دوو شەپۆڵی سارد و باراناوی، شەپۆڵێكی ساردی جەمسەری باكوور، هەروەها شەپۆڵی نزمە پاڵەپەستۆی دەریای سپی ناوەڕاست، ئەمەش وادەكات سەرەڕای دابەزینی پلەكانی گەرما، بارانبارین تاوەكو ڕۆژی چوارشەممە 27/11/ 2024 بەردەوام دەبێت. 

 

لێدوانی فەرمی: شێخ دارا، شارەزا و پێشكەشكاری كەشوهەوای ئاڤا میدیا لە گەشتی هەواڵەکانی کاتژمێر 07:00 ڕایگەیاند: "هەروەك هەفتەی ڕابردوو پێشبینیمان كردبوو، لەسەرەتای ئەم هەفتەیەوە شەپۆڵێكی بارانبارین هەرێمی كوردستان دەگرێتەوە و پلەكانی گەرماش زیاتر نزمدەبێتەوە بۆ 10 پلەی ژێر سفری سەدی، ئەوەش تا ڕۆژی چوارشەممە بەردەوام دەبێت.

 

زانیاریی زیاتر: هەرێمی كوردستان لەیەك كاتدا، كەوتووەتە ژێر كاریگەری دوو شەپۆڵی تێكەڵی ساردی جەمسەری باكوور و شەپۆڵی باراناوی دەریای سپی ناوەڕاست، كە دەبێتە هۆی بەفربارین، بەتایبەت لە ناوچە شاخاوییەكان و بەرزبوونەوەی ڕێژەی شێ تا 80% كە لە ناوچە شاخاوییەكان دەگاتە 95%.

 

ئەوەی پێشبینی دەكرێت: ئەمشەو بەرزترین ڕێژەی بارانبارین لە ناوچە شاخاوییەكانی سنوورەكان تۆمار دەكرێت، بەتایبەت دەڤەری حاجی ئۆمەران، كە پێشبینی دەكرێت بەڕێژەی 50 ملم بەفر و باران ببارێت.

 

ئەوەش بزانە: شەپۆڵەكە ناوچەكانی ناوەڕاست و باشووری عێراقیش دەگرێتەوە و پێشبینی دەكرێت بارانبارینی پچڕ پچڕ، شارەكانی عێراق بگرێتەوە.