10 ڕۆژە مقاوەمەی عێراقی هیچ هێرشێکی نەکردووەتەسەر ئیسرائیل

ئاڤا نیوز

 

هۆشدارییەکەی حکومەتی ناتانیاهۆ و ڕێکارەکانی حکومەتی عێراق، هێرشەکانی بەرەی مقاوەمەی عێراقی بۆسەر ئیسرائیل بە تەواوی ڕاگرتووە و 10 ڕۆژە ئەو گرووپە هیچ هێرشێکی نەکردووەتە سەر ئیسرائیل.

 

وێنە گەورەکە: 18ـی مانگی ڕابردوو ئیسرائیل لەڕێگەی ئەنجوومەنی ئاسایشەوە هۆشداری دایە عێراق کە ئەگەر هێرشی گرووپە چەکدارەکان بۆسەر وڵاتەکەی ڕانەگرێت، وەڵامیان دەداتەوە. دوابەدوای ئەوەش بەغدا ژمارەیەک ڕێکاری بۆ ڕاگرتنی هێرشەکان گرتەبەر.

 

زانیاریی بەدەستهاتوو: بەگوێرەی ناوەندی ڕاگەیاندنی مقاوەمەی ئیسلامی عێراقی کە زیاتر چالاکییەکانی لە تۆڕی کۆمەڵایەتی تەلەگرام بڵاودەکاتەوە، ئەو گرووپە دوایین هێرشی بۆسەر ئیسرائیل ڕۆژی 24ـی مانگی ڕابردوو کردووە و بە درۆن ئامانجێکی ئیسرائیلی لە باشووری فەلەستین کردووەتە ئامانج.

 

کاریگەریی و لێکەوتەوکان: هەرچەندە محەممەد شیاع سوودانی، سەرۆکوەزیرانی عێراق نامەکەی ئیسرائیلی بە پلانێک بۆ هێرشکردنەسەر وڵاتەکەی لە قەڵەم دا، بەڵام هەر ئەو کاتە فەرمانیشی بە هێزە ئەمنییەکان کرد ڕووبەڕووی هەر چالاکییەکی سەربازیی ببنەوە کە لە دەرەوەی کۆنترۆڵی دەوڵەت دەکرێت.