گوتەبێژی پۆلیسی كەركووک: هیچ مەترسییەک لەنێو شاری كەركووک نییە

ئاڤا نیوز 

 

لە ڕۆژانی ڕابردوو ژمارەیەک بەرپرسی باڵای شیعە بە سەردانی لەناكاو گەیشتنە کەرکووک و باس لە مەترسی بۆ سەر بارەگاكانی حەشدی شەعبی و گرووپە چەكدارەكانی دیكەی شیعە لە شارەكە دەكرێت، بەڕێوەبەری پۆلیسی كەركووكیش لەمبارەیەوە ڕوونكردنەوە دەدات.

 

لێدوانی فەرمی: موقەدەم عامر نووری، گوتەبێژی پۆلیسی كەركووک بە ئاڤا نیوزی ڕاگەیاند: هیچ مەترسییەک لەنێو شاری كەركووک نییە، بەڵام دەوروبەری شارەكە پێویستیی بە هەماهەنگیی زیاتری هێزە ئەمنییەكانە كە ئێستا بەهۆی كەمیی هەماهەنگییەكان بۆشاییەک لە دەوروبەری كەركووک دروست بووە و بووەتە هۆی جموجۆڵی چەكدارانی داعش.

 

گوتەبێژی پۆلیسی كەركووک ئاماژەی بە ئەوەش دا كە خەڵكی كەركووک هۆشیارترن لە پێشوو و هیچ بوارێک بە گرووپە تیرۆریستییەكان نادەن لەنێو شارەكە جوڵە و چالاكی و شانە نووستوویان هەبێت، هەربۆیە هیچ مەترسییەک لەنێو شارەكە نییە و سەردانی هادی عامری و عەمار حەكیم بۆ سنووری كەركووك سەردانێكی ئاسایی بووە.

 

"بەهۆی گۆڕانكارییەكانی سووریا و هەڕەشەكانی ئیسرائیل، نەک تەنیا حەشدی شەعبی بەڵكوو، سوپا و پۆلیسی فیدڕاڵی و تەنانەت پۆلیسی كەركووكیش ڕێوشوێنی پێویستیان بۆ خۆپاراستن گرتووەتە بەر" گوتەبێژی پۆلیسی كەركووك وایگوت.