حەشدی شەعبی هێزەکانی لە کەرکووک زیاد دەکات

ئاڤا نیوز

 

دەستەی حەشدی شەعبی ڕایگەیاند، پێگەی سەربازیی خۆی لە سنووری چوار پارێزگا بەهێزکردووە و کەرکووکیش یەکێکە لەو پارێزگایانە، جەختیش دەکاتەوە کە هەموو جووڵەیەکیان بەفەرمانی فەرماندەی گشتیی هێزە چەکدارەکانی عێراقە.

 

ئەوەی پێویستە بیزانیت: حەشدی شەعبی دامەزراوەیەکی سەربازیی عێراقە و کۆکەرەوەی گرووپە چەکدارییە شیعییەکانە، ماوەیەکە هەواڵی ئەوەش بڵاودەکرێتەوە کە ئەمریکا داوای هەڵوەشاندنەوەی ئەو هێزە و تێکەڵکردنی بە وەزارەتەکانی بەرگریی و ناوخۆی عێراق کردووە.

 

لێدوانی فەرمی: موهەنەد عەقابی، بەڕێوەبەری ڕاگەیاندنی دەستەی حەشدی شەعبی بە میدیای فەرمی عێراقی ڕاگەیاندووە، هێزەکانیان هەموو جووڵەیەکی سەربازییان بە فەرمانی فەرماندەی گشتی هێزە چەکدارەکانی عێراق و لە چوارچێوەی فەرماندەیی ئۆپەراسیۆنە هاوبەشەکانە، لەو چوارچێوەیەشدا هێزەکانیان لەناوچە سنوورییەکاندا بۆ پاراستنی ئاسایشی ئەو ناوچانەی کە گومانی دروستبوونی گرژیی لێدەکرێت، بڵاوەیان پێکراوە.

 

چی ڕوودەدات: حەشدی شەعبی ڕێکاری پێویستی گرتووەتەبەر و لە هەندێک شوێنیش بوونی سەربازیی خۆی بەهێزکردووە، بەتایبەت بەدرێژایی هێڵی سنووریی لە پارێزگاکانی ئەنبار، نەینەوا، کەرکووک و دیالە.