حووسییەکان هۆشداری لە کۆچپێکردنی دانیشتوانی غەززە دەدەن

ئاڤا نیوز

حوسییەکانی یەمەن ڕایانگەیاند، ئەگەر پلانی دۆناڵد ترەمپ، سەرۆکی ئەمریکا، بۆ کۆچپێکردنی دانیشتوانی غەززە جێبەجێ بکرێت، ئەوا ئەوانیش دەست بە هێرشە مووشەکی و درۆنییەکانیان دەکەنەوە. 

لێدوانی فەرمی: عەبدولمەلیک حوسی، ڕێبەری حوسییەکانی یەمەن کە لەلایەن ئێرانەوە پاڵپشتی دەکرێن، ڕایگەیاند هێزەکانیان هێرشی نوێ لە دژی بەرژەوەندییەکانی ئەمریکا و ئیسرائیل دەست پێدەکەنەوە، ئەگەر هەڕەشەکانی ترەمپ بۆ سەر خەڵکی غەززە و بزووتنەوەی حەماس جێبەجێ بکرێن.

ئەوەی لەوبارەیەوە دەگوترێت: ترەمپ پلانی هەیە دانیشتوانی غەززە بۆ وڵاتانی دەوروبەر، بە تایبەتیش بۆ میسر و ئوردن، بگوازێتەوە و ڕێگەش نەدات جارێکی دیکە بۆ غەززە بگەڕێنەوە. هاوکات دەیەوێت غەززە بخاتە ژێر کۆنترۆڵی ئەمریکا. ئەم پلانەی ترەمپ لە سەر ئاستی نێودەوڵەتی بە شێوەیەکی فراوان ڕەت کراوەتەوە.