ئەو ئۆتۆمبێلانەی لەسەر سەوزایى و شۆستەکان ڕادەگرن غەرامە دەکرێن

ئاڤا نیوز

بە هۆی زیانگەیاندن بە سەوزایى و شۆستەى ناو پارکەکان، هەڵمەتێک دەستپێکردووە بۆ سزادانى ئەو ئۆتۆمبێلانەى کە لە سەر ڕووبەرى سەوزایى و شۆستەى ناو پارک و تەنیشت پارکەکان ڕادەگیرێن.

چیرۆکی سەرەکی: تیمەکانی بەڕێوەبەرایەتیى ئەندازەى پارکەکانى هەولێر، بە هەماهەنگی لەگەڵ پۆلیسی شارەوانی، لە تەواوی سنووری سەرۆکایەتیی شارەوانی هەولێر هەڵمەتێکیان دەست پێکردووە بە پێدانی پسوولەی ئاگاداری بۆ ئەو شۆفێرانەی لەناو سەوزایی ئۆتۆمبێلەکانیان ڕادەگرن.

لێدوانی فەرمی: ڕێبین ئەحمەد، بەڕێوەبەری ئەندازەى پارکەکانى هەولێر، بە ئاڤا میدیای ڕایگەیاند، ڕاگرتنى ئەو ئۆتۆمبێلانەی دەبنە هۆی زیانگەیاندن بە سەوزایى و شۆستەى ناو پارک، سەرجەمیان پێبژاردنیان بۆ دەکرێت، لیستی ناوی ئەو ئۆتۆمبێلانەمان بەزیانەکانەوە بەرزکردۆتەوە بۆ بەڕێوەبەرایەتیى هاتووچۆی هەولێر، داوامان کردووە هیچ مامەڵەیەکیان بۆ نەکرێت تاوەکو سزا مادیەکەی نەدەن.

٠ ماتۆڕسکیلەکانیش هاوشێوەى ئۆتۆمبێل دەستى بەسەردا دەگیرێت و بەهەمان شێوەی ئۆتۆمبێل مامەڵەی لەگەڵ دەکرێت.

٠ ساڵی ڕابردوو پێبژاردنمان بۆ 816 ئۆتۆمبێل کردووە.