عێراق بەرهەمهێنانی نەوتی کەرکووک بۆ 450 هەزار بەرمیلی ڕۆژانە زیاد دەکات

ئاڤا نیوز

 

وەزیری نەوتی عێراق ڕایگەیاند، ڕێککەوتنەکەیان لەگەڵ کۆمپانیای بریتش پترۆڵیۆم (BP) بۆ پەرەپێدانی کێڵگە نەوتییەکانی پارێزگای کەرکووک، سێ دەستکەوتی بۆ عێراق دەبێت، لەوانەش زیادکردنی بەرهەمهێنانی نەوتی کەرکووک بۆ ڕۆژانەی 450 هەزار بەرمیل.

 

چیرۆکی سەرەکی: 10ـی ئەم مانگە حکومەتی عێراق و کۆمپانیای بریتش پترۆڵیۆم BP بۆ پەرەپێدانی کێڵگە نەوتییەکانی پارێزگای کەرکووک ڕێککەوتن، وەزیری نەوتی فیدڕاڵیش ڕایگەیاند، دەیانەوێت داهاتی عێراق لە نەوت و غاز زیاتر بکەن.

 

لێدوانی فەرمی: حەیان عەبدولغەنی، وەزیری نەوتی فیدڕاڵ بۆ ئاژانسی هەواڵی عێراقی ڕایگەیاند:

 

- ڕێککەوتنەکەمان لەگەڵ BP لە بوارەکانی بەهێزکردنی ژێرخان، بەرهەمهێنانی غاز و دابینکردنی هەلیکاری نوێ دەستکەوتی دەبێت.

 

- کێڵگەکانی کەرکووک تەمەنیان 100 ساڵە و ئێستا پێویستییان بە نۆژەنکردنەوە هەیە، لە دەرئەنجامیشدا بەرهەمی نەوتی کەرکووک بۆ 450 هەزار بەرمیلی ڕۆژانە زیاد دەبێت.

 

 - هەر بەگوێرەی ڕێککەوتنەکە ئاستی بەرهەمهێنانی غاز لە کەرکووک بۆ ڕۆژانە 400 ملیۆن پێ سێجا زیاد دەکرێت و کۆگاکانی کۆمپانیای غازی باکووریش نۆژەن دەکرێنەوە.

 

- وێستگەیەکی کارەبا بە توانای 400 مێگاوات دروست دەکرێت.

 

- ڕێککەوتنەکە هەلیکاری نوێ بۆ دانیشتووانی نزیک لە کێڵگە نەوتییەکان دابین دەکات، ئەوە جگە لە گەشەپێدانی پیشەسازیی بەرهەمە پترۆکیمیاوییەکان.