لە ئەمریکا 36 کەس بەهۆی زریانەوە گیانیان لەدەستدا

ئاڤا نیوز

 

بەهۆی مەترسی زریان و بای بەهێزەوە، ملیۆنان ئەمریکی لە ناوچەی مەترسیداردا ماونەتەوە، هاوکات ژمارەی قوربانییەکانیش ڕوو لە بەرزبوونەوەیە.

 

چی ڕوودەدات: 'با'یەکی تووند بە خێرایی 130 کیلۆمەتر لە کاتژمێرێکدا گەیشتووەتە ڕۆژهەڵات و هەڕەشە لە ڕۆژئاوای ناوەڕاست و باشووری ئەمریکا دەکات.

 

کاریگەری و لێکەوتەکان: بەهۆی ئەو زریان و بایەوە، چەندین بەشی ئەمریکا ڕووبەڕووی وێرانکاری بووەتەوە، لە ویلایەتی کانزاس، لانیکەم هەشت کەس گیانیان لەدەستدا  و زیاتر لە 55 ئۆتۆمبێل بەهۆی زریانەکەوە زیانیان بەرکەوت، هاوکات زیاتر لە 250 هەزار ماڵ و شوێن لە سەرانسەری حەوت ویلایەت بێ کارەبا بوون، لەنێویاندا میشیگان، میزۆری و ئیلینۆی.

 

ئەوەی پێشبینی دەکرێت: شارەزایانی کەشناسی پێشبینی دەکەن کەشوهەوای سەخت بەردەوامی هەبێت، ئەگەری توندتربوونی زریانەکەش لە ئارادایە، داوایان لە دانیشتووانی ناوچەکە کردووە خۆیان لەو شوێنانەی مەترسیی دارمانی لەسەرە، بەدوور بگرن.