بانکی ڕافیدەین دوو هەزار دۆلار بە بەهای فەرمی دەداتە حەجخوازان

ئاڤا نیوز

بانکی ڕافیدەین ڕایگەیاند؛ بڕی دوو هەزار دۆلار بە نرخی فەرمی بۆ حەجخوازان دابەش دەکەین، هاوکات لقەکانی لە ڕۆژانی هەینی و شەممەش دەکرێتەوە بۆ بەڕێکردنی مامەڵەکانیان.

وێنە گەورەکە: ساڵانە بۆ بەجێگەیاندنی فەریزەی حەج بە دەیان هەزار حەجخواز لە هەرێمی کوردستان و عێڕاقەوە لە ڕێگەی گەشتی ئاسمانی و وشکانییەوە گەشتی شاری مەککە دەکەن.

ڕاگەیێنراوی فەرمی: بانکی ڕافیدەین لە ڕاگەیێنراوێکدا ڕایگەیاند: بەیانی ئەمڕۆ هەینی دەستمانکرد بە کردنەوەی لقەکانمان بۆ دابینکردنی دراوی بیانی بۆ حەجخوازان، ئەمە بەشێکە لە هەڵمەتێکی ناوازە کە ئامانج لێی ئاسانکارییە بۆ دەستگەیشتن بە دوو هەزار دۆلار بۆ هەر حەجخوازێک بە نرخی فەرمی کە لەلایەن بانکی ناوەندی عێراقەوە پەسەندکراوە (1320 دینار بۆ هەر دۆلارێک).

زانیاریی زیاتر: ڕۆژی پێنجشەممە، یەکەم گەشتی حەجخوازانی عێراق بۆ شاری مەککە دەستپێکرد، ڕۆژی 19ـی ئایاریش یەکەم کاروانی حەجخوازان لە هەرێمی کوردستانەوە لە ڕێگەی ئاسمانییەوە گەشتی سعوودیە دەکەن.