ئەم هەفتەیە ئەپڵیکەیشنی پسووڵەی خۆراک لە هەولێر، سلێمانی و دهۆک کارا دەکرێت

ئاڤا نیوز

بەڕێوەبەری ڕێکخستنی پسووڵەی خۆراکی هەولێر بە ئاڤا میدیای وت، بڕیارە ئەم هەفتەیە ئەپڵیکەیشنی پسووڵەی خۆراک لە شارەکانی هەولێر و سلێمانی و دهۆک کارا بکرێت.

وێنە گەورەکە: پڕۆژەی بە ئەلیکترۆنیکردنی پسووڵەی خۆراک لەلایەن وەزارەتی بازرگانیی عێراق جێبەجێ دەکرێت، هەموو زانیارییەکانی پسووڵەی خۆراک لە ئەپڵیکەیشنێک دەبێت، هاونیشتمانی لە هەر گۆڕانکارییەک لە بەشە خۆراکی مانگانە ئاگادار دەکرێتەوە.

لێدوانی فەرمی: سیامەند قادر، بەڕێوەبەری ڕێکخستنی پسووڵەی خۆراکی هەولێر بە ئاڤا میدیای وت، وا بڕیارە ئەم هەفتەیە تیمی وەزارەتی بازرگانی بێنە هەر سێ پارێزگای هەولێر، سلێمانی و دهۆک و ئەپڵیکەیشنەکە کارا بکەن.

ئەوەی پێویستە بیزانیت:  تۆمارکردن لە پسووڵەی خۆراک لە سەرجەم پارێزگاکانی عێراق بە هەرێمی کوردستانیشەوە وەستاوە، تەنیا سڕینەوەی ناو هەیە. بەڕێوەبەری ڕێکخستنی پسووڵەی خۆراکی هەولێر دەڵێت: وەزارەتی بازرگانی عێراق دەیەوێت پارەیەکی کەمتر بداتە کڕینی خۆراک.

باکگراوند: ڕۆژی 2025-5-08، وەک یەکەم پارێزگای هەرێمی کوردستان ئەپڵیکەیشنی پسووڵەی خۆراک لە پارێزگای هەڵەبجە کارا کرا.