لەم مانگەدا ناوی سوودمەندبووانی یەکەی نیشتەجێبوونی کرێنشینان ڕادەگەیێنرێت

ئاڤا نیوز

پێداچوونەوە بەناوی ئەو کەسانەی فۆرمیان بۆ سوودمەندبوون لەیەکەکان پڕکردووەتەوە تەواو بووە، ماوەتەوە سەر ئەوەی لە ئایندەیەکی نزیک ناوی ئەو کەسانە ڕابگەیێنرێت کە یەکەکانیان بۆ دەرچووە.

وێنە گەورەکە: ساڵی 2021 وەزارەتی ئاوەدانکردنەوە و نیشتەجێکردن، فۆرمی ئۆنڵاینی بۆ دابەشکردنی 9 هەزار و 4 یەکە بە قیستی درێژخایەن بەسەر کرێنشینان بڵاو کردەوە. لە 68 هەزار کەس تەنیا 26 هەزار کەس فۆرمەکەیان بە دروستی پڕ کردبووەوە و کۆدیان بۆ هاتەوە.

لێدوانی فەرمی: زانا عەبدولعەزیز، بەڕێوەبەری گشتیی کاروباری تەکنیکی لە وەزارەتی ئاوەدانکردنەوە و نیشتەجێکردن بە ئاڤای ڕاگەیاند، "لیژنەکان لە پارێزگا و ئیدارە سەربەخۆکان وردبینی و پێداچوونەوەیان تەواوکردووە، نۆ هەزار و چوار کەس ناویان گەڕاوەتەوە وەزارەت لەماوەی ئەم مانگە تیروپشک بۆ دابەشکردنی یەکەکانیان دەکرێت."

بەوتەی بەڕێوەبەری گشتیی کاروباری تەکنیکی لە وەزارەتی ئاوەدانکردنەوە، لە هەر شوێنێک یەکەکان تەواو بن، بەسەر سوودمەندبووان دابەش دەکرێت و دەست بە وەرگرتنی قیستەکانیان دەکرێت.

بۆچی گرنگە: یەکەکان بە قیستی 20 بۆ 25 ساڵ دەدرێن بە کرێنشینان، ئامانج لێی کەمکردنەوەی ڕێژەی کرێچییە لە سەرتاسەری هەرێمی کوردستان.