ئاگرکەوتنەوەكانی سنووری سلێمانی دەیان دۆنم پووش و پاوان و دارییان سووتاندووە

ئاڤا نیوز

 

لە سنووری پارێزگای سلێمانی ئاگر لە چەند شوێنێک كەوتووەتەوە و بەو هۆیەوە دەیان دۆنم زەوی و داری سرووشتی سووتاون و زیان بە چەند باخێکیش گەیشتووە.

 

ڕاگەیێنراوی فەرمی: بەڕێوەبەرایەتیی پۆلیسی دارستان و ژینگەی سلێمانی ڕایگەیاند: ئاگر لە سنووری سەیرانگەی 'مێرگەپان' کەوتووەتەوە بەو هۆیەوە نزیکەی 10 بۆ 15 دۆنم پوش و پاوان سووتاوە، هاوکات پەڕاوی لێکۆڵینەوەش بۆ بابەتەکە کراوەتەوە.

 

-ئاگرێکی دیکە لە سنووری گوندی 'کلکەسماق' کەوتووەتەوە، بەو هۆیەوە نزیکەی 80 دۆنم پوش و پاوان و سەدان داری سرووشتی سووتاون، گومان دەکرێت بە هۆی خەڵووزی بەجێماوی گەشتیاران بووبێتە هۆی هەڵگیرساندنی ئاگرەكە و لێکۆڵینەوە لە ڕووداوەکە دەستی پێکردووە.

- ئاگرێکیش لە سنووری گوندەکانی 'گۆڕدێم، ئاڵەک، زێوێ' کەوتووەتەوە، بەو هۆیەوە نزیکەی 100 دۆنم پوش و پاوان و داری سرووشتی سووتان، بەڵام هۆکاری ئاگرکەوتنەوەکە نادیارە و لێکۆڵینەوە لەوبارەیەوە دەستی پێکردووە.

-ئاگرێک لە گوندی 'ئاڵاسیاو' کەوتووەتەوە، بەوهۆیەوە نزیکەی پێنج دۆنم پوش و پاوان و داری سرووشتی سووتان، هاروەها زیان بە چەند باخێکی هاووڵاتیانیش گەیشتووە.

ئەوەی پێویستە بیزانیت: کەسێک بە تۆمەتی ئاگرکەوتنەوەکەی گوندی ئاڵاسیاو دەستگیر کراوە.