دوایین زانیاری لەبارەی دۆخی کوڵەجۆ؛ چوار لیوای پێشمەرگە لە ئامادەباشیدان

ئاڤا نیوز

چەند ڕۆژێکە لە سنووری گەرمیان بەتایبەت لە ناحیەی کوڵەجۆ جووڵەی هێزە منییەکان هەیە، هێزێکی حەشدی شەعبی و سوپای عێراق نیوەڕۆی ئەمڕۆ چوونەتە سنووری کوڵەجۆ و لە سەنگەرەکانی پێشمەرگە نزیک بوونەتەوە، هێزی پێشمەرگەش لەو سنوورە خراوەتە حاڵەتی ئامادەباشییەوە.

چیرۆکی سەرەکی: هێزێکی سوپای عێراق چوونەتە چەمی گوندی ئیسلاح و گوندەکانی شێخ باوە و قایە، ئەم گوندانە دەکەونە ناوچەی بۆشایی ئەمنی لەنێوان پێشمەرگە و هێزە عێراقییەکان.

زانیاریی پەیامنێر: هێزەکەی عێراق ئەمڕۆ ئۆپەراسیۆنێکیان کردووە، 40 هەمەر و چەک و پێداویستی قورسیان پێبووە، دوو هەلیکۆپتەریش بەردەوام لە ئاسمان لەگەڵیان بوونە و سووڕاونەتەوە. ئۆپەراسیۆنەکەیان گەڕان و پشکنین بووە، لە سەنگەرەکانی پێشمەرگەش نزیک بوونەتەوە، دوای چەند کاتژمێرێک کۆتاییان بە ئۆپەرایسۆنەکەیان هێناوە و گەڕاونەتەوە شوێنی پیشووی خۆیان و هیچ سەنگەرێکیان دروست نەکردووە.

هێزی پێشمەرگە و پۆلیسی پاراستنی نەوت و گاز خۆیان لەو سنوورە هەن و ئەمنییەتی ئەو ناوچانە دەپارێزن، ماوەی دوو ڕۆژیشە لیوای نۆی پێشمەرگە لە ناوچەی تەیناڵ کە دەکەوێتە نێوان بازیان و چەمچەماڵ براونەتە سنووری کفری، هێزی پێشمەرگە دەستیان بە لێدانی خەندەق و ساتر کردووە و ئامادەکاری دەکەن بۆ هەر ڕووبەڕووبوونەوەیەک.

جگە لە لیوای نۆ، سێ لیوای تری پێشمەرگەش خراونەتە حاڵەتی ئامادەباشی هەر لە کوڵەجۆوە هەتا کێڵگەی نەوتی قەمەر.

هۆکارە زانراوەکان: ئەم ئاڵۆزییە دوای بڕیاری بەقەزابوونی قەرەتەپە دروست بووە کە 2ـی تەمموزی ئەمساڵ بڕیاری بەقەزابوونی درا لەلایەن حکومەتی عێراق.

ناحیەی کوڵەجۆ کە ئێستا سەر بە کفرییە دەخرێتە سەر قەزاکە، ئەم بڕیارە نیگەرانی کوردی لێ کەوتووەتەوە، وەک هەوڵێک دەبینرێت بۆ گۆڕینی هەیکەلیەتی ئیدرای و جوگرافیای دانیشتووانی ناوچەکە.

مەترسییە زانراوەکان: گومانی ئەوە هەیە هێزە عێراقییەکان بیانەوێت دەست بەسەر کێڵگە نەوتییەکانی ئەو سنوورەدا بگرن بەتایبەت کێڵگەی نەوتی قەمەر کە شوێنێکی ستراتیژییە.

پێشمەرگە خەندەقی بە چواردەوری بیری نەوتی قەمەردا لێداوە، بۆ ئەوەی لە هەر حاڵەتێکدا بێت ئەگەر هێزە عێراقییەکان پیشڕەوییان کرد ڕێگرییان لێ بکەن دەست بەسەر بیرە نەوتەکەدا بگرن.