هەنگاوێکی مێژوویی.. گەڕی یەکەمی چەکدانانی پەکەکە لە سنووری سلێمانی دەستپێدەکات

ئاڤا نیوز

زانیاریی بەدەستهاتوو: هەنگاوێکی مێژووی لە پەکەکەوە بۆ بەرقەرارکردنی ئاشتی لە تەواوی جیهان، ئەمڕۆ هەینی یەکەم گەڕی چەکدانانی پەکەکە بە بەشداریی نوێنەری زۆرینەی لایەنە سیاسییەکان و نوێنەری حکومەتی عێراق و هەرێمی کوردستان لە سنووری دەڤەری پشدەر دەستپێدەکات. 

چی ڕوودەدات؟: ئەمڕۆ هەینی 11-7-2025، لە چوارچێوەی هەوڵەکان بۆ سەرخستنی پڕۆسەی ئاشتی، پارتی کرێکارانی کوردستان لەسەر داوای عەبدوڵڵا ئۆجەلان، ڕێبەری زیندانی کراوی پەکەکە بۆ خۆ هەڵوەشاندنەوە و کۆتایی هێنان بە خەباتی چەکداریی، نزیکە 50 چەکداری ئەو ڕێکخراوە لە سنووری دەڤەری پشدەر چەکەکانیان دادەنێن. 

مەراسیمی چەکدانانی پەکەکە لە سنووری دەڤەری پشدەر لە پارێزگای سلێمانی دەستپێدەکات، هاوکات چەند شوێن وەکو ناوچەی پارێزراو بۆ چەکدانانی پەکەکە دیارکراون بەڵام بەدیارکراوی دیار نییە لە کوێ مەراسیمەکە دەکرێت. لەوانە؛ گوندی دەروو کۆتر، گوندی دۆڵە بەفرە، گوندی تووەسوران، گوندی زوورکان، لە سنووری قەزای قەڵادزێی سەر بە ئیدارەی ڕاپەرین لە پارێزگای سلێمانی.

 

لە قەزای دووکان، ژمارەیەکی زۆر لە نوێنەری لایەنە سیاسییەکان و نێردراوی میدیا ناوخۆی و جیهانییەکان کۆبوونەتەوە و بڕیارە لە چەند خولەکی داهاتوودا لە ڕێگەی چەند پاسێکەوە بۆ شوێنێکی دیارکراو بگوازرێنەوە، تاوەکو بینەری مەراسیمی چەکدانانی پەکەکە بن لە ڕێگەی شاشەیەکی گەورەوە کە بۆیان دابینکراوە.


زانیاریی پەیامنێر: هەنگاو محەممەد، پەیامنێری ئاڤا لە سنووری ئیدارەی ڕاپەڕین ڕایگەیاند، هیچ جموجۆڵێکی نائاسایی لەو شوێنانە نابینرێت کە وەکو ناوچەی پارێزراو بۆ چەکدانانی پەکەکە دیاریکراون، چاوەڕان دەکرێت مەراسیمەکە لە شوێنێک بکرێت کە لە نێوان قەزای ڕانیە و دووکان بێت، بەڵام زانیاریی تەواو نییە کە بە دیاریکراوی کوێ دەبێت. 

ژیوار عەبدولڕەحمان، پەیامنێری ئاڤا لە سلێمانی ڕایگەیاند، ژمارەیەک بەرپرس و نوێنەری لایەنە سیاسییەکان بانگهێشت کراون بۆ مەراسیمی چەکدانانی پەکەکە لە ڕێگەی شاشەیەکی گەورەوە بینەری مەراسیمەکە دەبن، دڵشاد شەهاب، نوێنەری سەرۆکی هەرێمی کوردستان، هێمن هەورامی، نوێنەری سەرۆک بارزانی، بەسی هۆزات مستەفا قەرەسو، نوێنەری پەکەکە، هەروەها نوێنەری حکومەتی عێراق و هەرێمی کوردستان بەشدارن.

باکگراوند: پارتی کرێکارانی کوردستان سەرەتای دروستبوونی دەگەڕێتەوە بۆ ساڵی 1978 و وەکو پارتێکی مارکسیس بە بەشداری 23 ئەندامی کۆنگرە دەستی بە کاری سیاسی کرد. دواتر لە ساڵی 1980 لە سەروبەندی کودەتای تورکیا، بارودۆخی ناوچەکە و هەرێمی کوردستانیش گۆڕانکاری گەورەی بەسەرداهات و پەکەکە لە گرووپێکی سیاسییەوە کارەکانی گۆڕی بۆ ڕێکخراوێکی چەکداری. 

نوێدەکرێتەوە...