لە شەش مانگدا زیاتر لە 80 هەزار ئۆتۆمبێل هاردەی هەرێمی کوردستان کراوە

ئاڤا نیوز

بەگوێرەی داتای بەڕێوەبەرایەتی بازرگانی هەرێمی کوردستان، لە شەش مانگی یەکەمی ئەمساڵدا 81 هەزار ئۆتۆمبێل لە چوار دەروازەی سەرەکی وشکانی هاوردەی هەرێمی کوردستان کراون.

وێنە گەورەکە: لە هەرێمی کوردستان بەشێوەیەکی سەرەکی هاونیشتمانیان بۆ هاتوچۆکردن پشت بە ئۆتۆمبێل دەبەستن، بۆیە لە هەرێمی کوردستاندا زیاتر لە دوو ملیۆن ئۆتۆمبێل تۆمار کراون و خواست لەسەر کڕینی ئۆتۆمبێل بەردوام زیاد دەکات.

 

لێدوانی فەرمی: نەوزاد شێخ کامیل، بەڕێوەبەری گشتی بازرگانی هەرێمی کوردستان بە ئاڤا میدیای ڕاگەیاند، لەماوەی شەش مانگدا زیاتر لە 380 مۆڵەتی هێنانی ئۆتۆمبێل دراوەتە بازرگانان. هاوکات 81 هەزار ئۆتۆمبێلیش هاوردە کراوە. ئەو ژمارەیە لە وڵاتەکانی وەک سین، یابان، ئەمریکا و وڵاتانی کەنداوەوە  لەڕێگای هەریەکە لە دەروازەکانی ئیبراهیم خەلیل، حاجی ئۆمەران، پەروێزخان و باشماخ هێنراون بۆ کوردستان.

 

ژمارەکان وادەڵێن: بەپێی داتاکانی بەڕێوەبەرایەتی گشتی بازرگانی، ساڵی 2023، ژمارەی ئەو مۆڵەتە بازرگانیانەی بۆ هێنانی ئۆتۆمبێل درابوون بە بازرگانان 900 مۆڵەت بووە و 122 هەزار ئۆتۆمبێلیش هاوردە کرابوون. ساڵی 2024 ژمارەی مۆڵەتی بازرگانی 924 مۆڵەت بووە و 172 هەزار و 234 ئۆتۆمبێل هاوردە کرابوون.

ئەوەی پێویستە بیزانیت: بەپێی ڕاپۆرتێکی دەزگای "عێراقی داهاتوو" لە شەش مانگی یەکەمی ئەمساڵدا 584 هەزار ئۆتۆمبێل هاوردەی عێراق کراوە و بەراورد بە هەمان ماوەی ساڵی ڕابردوو %65 زیادیکردووە. لەو ژمارەیە 18 هەزار ئۆتۆمبێلیان لە چینەوە هاوردە کراون.