لە هەولێر بەنزینی پاڵپشتیکراو دابەش دەکرێت

ئاڤا نیوز

لەماوەی ڕابردوودا بەهۆی ئەنجامدانی هێرشە درۆنییەکانەوە بۆ سەر کێڵگە نەوتییەکانی کوردستان بڕی بەرهەمهێنانی بەنزین کەمیکردبوو، ماوەی دوو ڕۆژە دۆخەکە ئاسایی بووەتەوە و دابەشکردنی بەنزینی پاڵپشتیکراو لە هەولێر زیادی کردووەتەوە. 

چیرۆکی سەرەکی: حکومەتی هەرێمی کوردستان، وەکو هاوکارییەک بۆ هاونیشتمانییان تاوەکو نرخی بەنزین لە ئاستێکدا جێگیر بکات و زەرەرمەند نەبن لە بەرزبوونەوەی نرخ، بەنزینی پاڵپشتیکراو بۆ ژمارەیەکی زۆر لە بەنزینخانەکانی تەواوی پارێزگاکان دابین دەکات. 


زانیاریی تایبەت: سەرچاوەیەک لە بەڕێوەبەرایەتیی نەوت و کانزاکانی هەولێر بە ئاڤای گوت، لە دوێنێوە ژمارەی ئەو بەنزینخانانەی بەنزینی پاڵپشتیکراو دابەش دەکەن بەرز بووەتەوە و  ڕۆژانە 864 هەزار لیتر بۆ زیاتر لە 25 بەنزینخانە دابین دەکرێت.

ئەو سەرچاوەیە ئاماژەی بۆ ئەوەش کرد، ئەمڕۆ 26 بەنزینخانەی سنووری پارێزگای هەولێر بەنزینی پاڵپشتیکراو بە نرخی 750 دینار دابەش دەکەن، لە دیاری کردنی ئەو بەنزینخانانە ڕەچاوی سنووری جوگرافی کراوە، بۆ ئەوەی بەشێوەیەکی هاوسەنگ و دادپەروەر لە سەنتەری شاری هەولێر و قەزا و ناحیەکان هاونیشتمانیان لەو بەنزینە سوودمەند بن.

ئەوەی پێویستە بیزانیت: لە ماوەی ڕابردوو، بەهۆی هێرشە درۆنییەکان و وەستانی پرۆسەی بەرهەمهـێنان لە بەشێکی کێڵگە نەوتییەکانی هەرێمی کوردستان ، پێدانی بەنزین بە نرخی پاڵپشتیکراو لە 936 هەزار لیتر بەنزینی ڕۆژانە بۆ 504 هەزار لیتر دابەزی، بەڵام ئێستا دۆخی دابین کردنی بەنزینی پاڵپشتیکراو ئاسایی بووەتەوە.