ئەمریکا سێ هەفتە بە حکومەتی عێراق دەدات بۆ چەککردنی حەشدی شەعبی

ئاڤا نیوز

ئەمریکا کەمتر لە مانگێک مۆڵەت بە بە‌غدا دەدات بۆ دانانی پلانێك لەپێناو چەککردنی حەشدی شەعبی و گرووپە چەکدارەکانی سەر بە ئێران.

چیرۆکی سەرەکی: بەرپرسانی باڵای ئەمریکا لە پەیامێکی "ڕاستەوخۆ" سێ هەفتە مۆڵەتیان بە بەرپرسانی حکومەتی عێراق داوە بۆ داڕشتنی پلانێکی "کردار"ـی بۆ چەکداماڵینی حەشدی شەعبی، لە بەرامبەردا ئێران جمووجۆڵەکانی لە عێراق زیاد کردووە و پێشبینی دەکرێت عێراق لە داهاتوودا ببێتە گۆڕەپانی شەڕ لەنێوان ئیسرائیل و ئێران.

لێدوانی فەرمی: سەرچاوەیەکی حکومەتی عێراق بە ماڵپەڕی "ئیرەم نیوز"ـی ڕاگەیاندووە، لەم دواییانەدا بەرپرسێکی باڵای حکومەتی عێراق نامەیەکی لە مارکۆ ڕۆبیۆ، وەزیری دەرەوەی ئەمریکاوە پێگەیشتووە لە ڕێگەی دیپلۆماتکارە ئەمریکییەکانەوە، تێیدا ڕۆبیۆ جەختی لەوە کردووەتەوە حکومەتی عێراق بە زووترین کات پلانێک بۆ داماڵینی چەک لە دەستی حەشدی شەعبی دابڕێژێت و واشنتنیش لەم هەوڵەدا هاوکاری بەغدا دەکات.

ئەو سەرچاوەیە ڕوونیشیکردەوە کە پەیامەکەی ڕۆبیۆ  ڕوون بوو "سزایەکی تووند" دەسەپێنێت ئەگەر عێراق بەخێرایی هەنگاو نەنێت بۆ چەکداماڵینی هێزەکانی حەشدی شەعبی.

 

زانیاریی زیاتر: ئەو سەرچاوەیە ئاماژەی بەوەشکرد، هەمان هەڵوێست لەلایەن ستیڤن ڤەیگن، هەڵسوڕێنەری کاروباری باڵیۆزخانەی ئەمریکا لە بەغدا، لە میانی دیدارەکەیدا لەگەڵ بەرپرسێکی باڵای ئەنجومەنی ئاسایشی نیشتمانیی عێراق دووپاتکراوەتەوە، ڤەیگن ئاماژەی بەوەداوە کە واشنتن وادەیەکی بە بەغدا داوە لە سێ هەفتە زیاتر نەبێت بۆ ئەوەی پلانێکی کردەیی لەو بارەوە دابڕێژێت، ئەگەرنا ڕووبەڕووی زنجیرەیەک سزا دەبێتەوە.

لەلایەکی دیکەوە: ئەو ماڵپەڕە لە چەند سەرچاوەیەکی ئاگادار ئاشکرای کردووە کە ئەریج مەسجدی، جێگری فەرماندەی فەیلەقی قودسی سوپای پاسدارانی ئێران هەفتەی ڕابردوو بە مەبەستی هەڵسەنگاندنی ئامادەیی گرووپە چەکدارەکان و ئامادەکارییەکانیان بۆ قۆناغی داهاتوو سەردانی بەغدا و ژمارەیەک شار و شوێنی دیکەی عێراقی کردووە.