یەکەم سەنتەری چاندنی مۆخی ئێسک لە هەولێر دروست دەکرێت

ئاڤا نیوز

 

وەزارەتی تەندروستیی هەرێمی کوردستان یەکەم سەنتەری چاندنی مۆخی ئێسک لە شاری هەولێر دروست دەکات و بێبەرامبەر چارەسەر پێشکەش دەکات. 

 

ئەوەی پێویستە بیزانیت: چاندنی مۆخی ئێسک یەکێکە لەو ڕێگەیانەی کە بۆ چارەسەرکردنی نەخۆشییەکانی شێرپەنجەی خوێن بەکاردەهێنرێت، ئێستا لە تەواوی هەرێمی کوردستان تەنیا لە پارێزگای سلێمانی سەنتەری چاندنی مۆخی ئێسک هەیە. 

 

لێدوانی فەرمی: د. سەرکار سوورچی، گوتەبێژی وەزارەتی تەندروستیی هەرێمی کوردستان بە ئاڤا نیوزی ڕاگەیاند: وەزارەتی تەندروستی پلانی بۆ دروستکردنی سەنتەرێکی مۆدێرن و پێشکەوتووی چاندنی مۆخی ئێسک لە شاری هەولێر هەیە، سەنتەرەکە بێبەرامبەر خزمەتگوزارییەکان پێشکەشی نەخۆش دەکات. 

 

بۆچی گرنگە: بە کردنەوەی سەنتەرەکە لە شاری هەولێر، فشار لەسەر سەنتەری چاندنی مۆخی سلێمانی نامێنێت، هەروەها پێویست ناکات خەڵک بۆ ئەم چارەسەرە سەردانی دەرەوەی وڵات بکات، کە تێچووی هەر نەشتەرگەرییەکی چاندنی مۆخی ئێسک لە دەرەوەی وڵات 50 هەزار دۆلارە، لەکاتێکدا لە هەرێمی کوردستان بێبەرامبەر خزمەتگوزارییەکانی چارەسەرکردنی ئەم نەخۆشییە پێشکەش دەکرێت.