هەر وەبەرهێنێک یاسای سەوزایی پێشێل بکات مۆڵەتی پڕۆژەکەی هەڵدەوەشێتەوە

ئاڤا نیوز  

دەستەی وەبەرهێنانی هەرێمی کوردستان جەخت لەوە دەکاتەوە، دەبێت وەبەرهێنەرەکانی پڕۆژەی نیشتەجێبوون گرنگی بە ڕێژەی سەوزایی و خزمەتگوزارییەکان بدەن، بەپێچەوانەوە وەبەرهێنەرەکە دووچاری ڕێکاریی یاسایی دەکرێتەوە.

وێنە گەورەکە: بە گوێرەی یاسای دەستەی وەبەرهێنان، هەر پڕۆژەیەکی نیشتەجێبوون بەگوێرەی قەبارە و ڕووبەرەکەی ڕێژەی سەوزایی و خزمەتگوزارییە گشتییەکانی بۆ دادەنرێت کە پێویستە وەبەرهێنەر پابەندیان بێت، بە پێچەوانەوە دووچاری سزا دەبێتەوە.

لێدوانی فەرمی: بەرگەشت ئاکرەیی، گوتەبێژی دەستەی وەبەرهێنان بە ئاڤا نیوزی گوت: ئەو وەبەرهێنەرانەی لە پڕۆژەکانی نیشتەجێبوون کەمتەرخەمیی دەنوێنن لە ڕاپەڕاندن و جێبەجێکردنی پڕۆژەکە یان ئەو کاتەی بۆی دیاری کراوە پڕۆژەکە تەواو ناکات، چەندین ڕێکاری یاسایی دژیان دەگیرێتە بەر.

ئەوەی پێویستە بیزانیت: لە کاتی کەمتەرخەمی، بە پێی ماددەی نۆیی یاسای دەستەی وەبەرهێنان، وەبەرهێنەرەکە چەند جارێک ئاگادار دەکرێتەوە و ئەگەر کەموکوڕییە دەستنیشانکراوەکانی چارە نەکرد، ئەوا دەستەی وەبەرهێنان مۆڵەتی پڕۆژەکەی لێوەردەگرێتەوە و دەیداتە وەبەرهێنەرێکی دیکە.