هەڵەبجە دەبێتە ئەندامی تۆڕی شارە بەهێزەكانی جیهان

 ئاڤا نیوز

پارێزگای هەڵەبجە لەسەر ئاستی عێراق و هەرێمی کوردستان، وەک  بەهێزترین شار بۆ تۆڕی 'شارە بەهێزەکانی جیهان'، دیاری کرا. 

لێدوانی فەرمی: ڕاستگۆ عادل بەرپرسی بەشی پەیوەندییەکان و هەماهەنگی لە بەڕێوەبەرایەتیی کۆچ و کۆچبەرانی هەڵەبجە، بە ئاڤانیوزی گوت: ئەم تۆڕە نێودەوڵەتییە و زیاتر لە 230 شار لە سەرانسەری جیهان ئەندامن تێیدا، وەک دوبلین لە ئێرلەندا و مەدرید لە ئیسپانیا.

زانیاریی زیاتر: ئامانج لە بوونە ئەندامی ئەم تۆڕە، گرنگیدانە بە شارەکان لەڕووی پەرەپێدان و ئاشتی و کرانەوە و هۆکارێکیشە بۆ گواستنەوەی ئەزموونی هەر شارێک لە بابەتێکی دیاریکراودا. بەشداربوون لە تۆڕەکە، ڕاکێشانی هەلی کارە لە نێو ئەو شارانەی گرفتێکیان هەیە تا توانای گەنجان پەرەی پێ بدرێت.

بۆچی گرنگە: هەڵەبجە وەک پارێزگایەکی خاوەن کەیسی جینۆسایید، بە ڕووی جیهاندا دەکرێتەوە و زیاتر دەناسرێت، ئەمەش دەروازەیەک دەبێت بۆ دروستبوونی دەرفەتی زیاتر بۆ خزمەتکردن و بەرەوپێشچوونی شارەکە.