ڕێوڕەسمی خەڵاتەکانی گرامی لە ئەمریکا بەڕێوەدەچێت

ئاڤا دیجیتاڵ  

 

ڕێوڕەسمی خەڵاتەکانی گرامی دیارترین و گەورەترین ڕووداوی مۆسیقا و گۆرانییە لە جیهان بەڕێوەدەچێت و تێیدا چەند هونەرمەندێک وەک باشترینی ساڵی ڕابردوو دیاری دەکرێن. 

 

وێنە گەورەکە: ڕۆژی یەکشەممە، 04-02-2024 66ـەمین خولی دابەشکردنی خەڵاتەکانی گرامی بۆ دیاریکردنی باشترینەکان لە بواری مۆسیقا و گۆرانی لە شاری لۆس ئانجلێسی ئەمریکا بەڕێوەدەچێت.

 

بۆچی گرنگە: خەڵاتی گرامی هەمان قورسایی خەڵاتی ئۆسکاری هەیە لە جیهانی سینەمادا، تەنیا ئەوە نەبێت کە گرامی تایبەتە تەنیا بە مۆسیقا و گۆرانی. 

 

زانیاریی زیاتر: لەمساڵدا سێ بەشی دیکە بۆ ئەم خەڵاتە زیادکراوە (باشترین ژەنینی مۆسیقای ئەفریقی، باشترین ئەلبومی جاز و باشترین سەمای پۆپ)، مەبەست لەم زیادکردنە ئەوەیە کە دابەشکردنی خەڵاتەکان ڕوونتر و دادوەرانەتر بێت. 

 

چی لەبارەوە دەگوترێت: بە بۆچوونی شارەزایان گرامی بە بەناوبانگترین و گرنگترین خەڵاتەکانی جیهانی مۆسیقا لە جیهاندا دادەنرێت. ئەوان لە بنەڕەتدا پێیان دەگوت خەڵاتەکانی گرامافۆن، چونکە خەڵاتەکە گرامافۆنێکی زێڕینە. 

 

ئەوەی پێویستە بیزانیت: گرامی یەکەمین خەڵاتەکانی سێ تۆڕی گەورەی مۆسیقایە کە ساڵانە بەڕێوەدەچێت. بە یەکێک لە چوار خەڵاتە سەرەکییەکانی ساڵانەی ئەمریکا دادەنرێت لەگەڵ خەڵاتەکانی ئۆسکار (بۆ فیلم) ، خەڵاتەکانی ئێمی (بۆ تەلەڤزیۆن) و خەڵاتەکانی تۆنی (بۆ شانۆ).

باکگراوند: خەڵاتەکانی گرامی لەلایەن ئەکادیمیای تۆمارکردنی ئەمریکاوە پێشکەش دەکرێت بۆ ڕێزلێنان لە دەستکەوتە ناوازەکان لە جیهانی مۆسیقادا. یەکەم ڕێوڕەسمی خەڵاتەکانی گرامی لە 04ـی ئایاری 1959 بەڕێوەچوو بۆ ڕێزلێنان لە دەستکەوتە مۆسیقییەکانی ساڵی 1958.