سەرۆکوەزیران بارزانی: پێویستە لە کاتێکی گونجاوی ئەمساڵدا هەڵبژاردنی پەرلەمان بکرێت

ئاڤا نیوز

 

سەرۆکوەزیران بارزانی و باڵیۆزی بەریتانیا لە عێراق کۆبوونەوە و سەرۆکوەزیران بارزانی جەختی لە بەڕێوەچوونی هەڵبژاردن لە وادەیەکی گونجاوی ئەمساڵ کردەوە.

 

وێنە گەورەکە: سەرۆکوەیزان بارزانی و ستیڤن هیچن، باڵیۆزی بەریتانیا لە عێراق کۆبوونەوە و گفتوگۆ لەبارەی سەردانی ئەم دواییەی بۆ بەغدا بۆ چارەسەرکردنی کێشەکانی نێوان هەولێر و بەغدا، پڕۆژەی ڕێگەی گەشەپێدان و هەڵبژاردن کرا.

 

لێدوانی فەرمی: سەرۆکوەزیران بارزانی ڕایگەیاندووە، هاوڕابووین لەسەر گرنگیی چارەسەرکردنی هەموو کێشە و ئاستەنگەکانی بەردەم هەڵبژاردن و بەشداربوونی هەموو لایەنەکان و پاراستنی مافی پێکهاتەکان، هەروەها پێویستی ئەنجامدانی هەڵبژاردن لە کاتێکی گونجاوی ئەمساڵ.

 

زانیاریی زیاتر: لە بەشێکی دیکەی کۆبوونەوەکە، گفتوگۆ لەبارەی پڕۆژەی ڕێگەی گەشەپێدان و بەستنەوەی وڵاتانی کەنداو لەڕێگەی هێڵی ئاسنینی عێراق بە تورکیا و وڵاتانی ئەوروپا کرا، سەرۆکوەزیران بارزانی جەختی لە پێویستی تێپەڕینی هێڵەکە بە هەرێمی کوردستان و سوودمەندبوونی هەموو پێکهاتە و ناوچەکانی عێراق لەم پڕۆژە ستراتیژییەدا کردەوە.