ترەمپ: نەتانیاهۆ لە دواساتدا لە ئۆپەراسیۆنی کوشتنی قاسم سولەیمانی کشایەوە

ئاڤا دیجیتاڵ

دۆناڵد ترەمپ، سەرۆکی پێشووی ئەمریکا، دوای چوار ساڵ زانیاری نوێ لەبارەی ئۆپەراسیۆنی کوشتنی قاسم سولەیمانی، فەرماندەی فەیلەقی قودسی سوپای پاسداران ئاشکرا دەکات و دەڵێت، ئیسرائیل لە ئۆپەراسیۆنەکەدا بەشداربوو، بەڵام لە دواساتەکاندا کشایەوە.

بۆچی گرنگە: قاسم سولەیمانی، فەرماندەیەکی چالاکی سوپای پاسداران بوو کە داڕێژەری چالاکییە سەربازییەکانی ئێران بوو لە ڕۆژهەڵاتی ناوەڕاست و کوژرانی گورزێکی کوشندە بوو بۆ ئێران کە دژی بەرژەوەندییەکانی ئەمریکا و ئیسرائیل کاری دەکرد لە ناوچەکەدا.

لەدوای کوژرانی قاسم سولەیمانی، بنیامین ناتەنیاهۆ، سەرۆکوەزیرانی ئیسرائیل، ستایشی دۆناڵد ترەمپی کرد بۆ کوشتنی قاسم سولەیمانی و گوتی، "هاوشانی ئەمریکا دەبین بۆ بەدیهێنانی ئاسایش و ئاشتی" لە ناوچەکەدا.

 

لێدوانی فەرمی: دۆناڵد ترەمپ لە چاوپێکەوتنێکدا لەگەڵ فۆکس نیوزی ئەمریکی ڕایگەیاند، "کاتێک کە قاسم سولەیمانیمان کوشت، دەبووایە ئیسرائیلیش لەگەڵمان بووایە"، بەڵام دوو ڕۆژ پێش ئەنجامدانی هێرشەکە بنیامین نەتانیاهۆ گوتی، " ناتوانین ئەوە بکەین" و لە پرۆسەکە کشانەوە.

"جەنەراڵێکم لەگەڵ بوو، زۆر نایاب بوو، پێم گوت، دەتوانین بەتەنیا ئەو کارە بکەین؟ ئەویش گوتی: بەڵی گەورەم دەتوانین، بڕیارەکە دەکەوێتەوە سەر خۆت، منیش گوتم، ئەنجامی دەدەین"، ئەمە گوتەی سەرۆکی پێشووی ئەمریکایە.

باکگراوند: کاتژمێر دووی بەرەبەیانی 03-01-2020 فڕۆکەیەکی بێ فڕۆکەوانی ئەمریکی لە نزیک فڕۆکەخانەی نێودەوڵەتی بەغدا بە سێ مووشەک ئۆتۆمبێلەکانی هەریەک لە قاسم سولەیمانی و ئەبو مەهدی موهەندیس، جێگری سەرۆکی دەستەی حەشدی شەعبی، بەئامانج گرت و لە هێرشەکەدا هەردووکیان کوژران.