لە كەركووک پۆستێكی باڵای ئەمنیی لە كورد وەردەگیرێتەوە

ئاڤا نیوز

 

بەڕێوەبەری پۆلیسی کەرکوک خانەنشین کرا و بەڕێوەبەرێکی عەرەب لەشوێنی دانرا.

وێنە گەورەکە: ماوەی حەوت ساڵە هەر گۆڕانکارییەک لە پۆستەکانی پارێزگای کەرکووک کرابێت، پشکی کورد لەو پارێزگایە دەستکاری کراوە و کەسانی سەر بە نەتەوەی دیکە لەشوێنیان دانراون.

لێدوانی فەرمی: حەسەن مەجید، ئەندامی ئەنجوومەنی پارێزگای کەرکووک لە فراکسیۆنی پارتی دیموکراتی کوردستان بە ئاڤا نیوزی ڕاگەیاند: ئەمڕۆ پێنجشەممە فەرمانی خانەشین بوونی لیوا کاوە غەریب بەڕێوەبەری فەرماندەی گشتی پۆلیسی کەرکووک جێبەجێکراوە، لەشوێنی ئەو عەمید فەتاح مەحمود یاسین خەفاجی دانراوە کە عەرەبە، لەکاتێکدا ئەم پۆستە پشکی کوردە.

ئەوەی پێویستە بیزانیت: بەگوێرەی زانیارییەکانی ئاڤا نیوز، لەدوای 16ی ئۆکتۆبەری 2017 ەوە، کورد نزیکەی 40 پشکی لە پارێزگای کەرکووک لەدەستداوەو بە خەڵکی عەرەب شوێنەکانیان پڕکراوەتەوە، ئەو پۆستانەش بەڕێوەبەری پۆلیس تا بەڕێوەبەری ناحیە و قایمقام و بەڕێوەبەری بەش لە کۆمپانیای نەوتی باکوور.