سەرۆکوەزیران بارزانی بەردی بناغەی سایلۆی هەڵەبجە دادەنێت

ئاڤا  نیوز

 

سەرۆکوەزیران بارزانی سەردانی پارێزگای هەڵەبجە دەکات و بەردی بناغەی سایلۆی شارەکە دادەنێت.

 

چیرۆکی سەرەکی: لە چوار مانگی ڕابردوو و بۆ جاری دووەم، ئەمڕۆ یەکشەممە کاتژمێر 11:00ـی بەیانی، سەرۆکوەزیران بارزانی دەچێتەوە بۆ پارێزگای هەڵەبجە و بەردی بناغەی سایلۆی هەڵەبجە دادەنێت و لە هاوینەهەواری ئەحمەدئاوا لەگەڵ دەیان کەسایەتی و کاسپکاری پارێزگاکە کۆ دەبێتەوە.

 

بۆچی گرنگە: ساڵانە جووتیارانی سنووری پارێزگای هەڵەبجە بەهۆی نەبوونی سایلۆ بەشێک لە بەرهەم و گەنمەکەیان تێک دەچوو، بەڵام دروستکردنی سایلۆکە خزمەتێکی گەورە بە جووتیارانی ناوچەکە دەکات لە پاراستن و ساغکردنەوەی.

 

لێدوانی فەرمی: کاوە عەلی، جێگری پارێزگاری هەڵەبجە بە ئاڤا نیوزی گوت: دەست بە دروستکردنی سایلۆکە کراوە، ئەمڕۆش سەرۆکوەزیران بارزانی سەردانی پارێزگاکە دەکات و بەردی بناغەی دادەنێت.

 

ژمارەکان وادەڵێن: سایلۆکە لەسەر ڕووبەری زیاتر لە 50 دۆنم زەوی بە تێچووی نزیکەی 25 ملیار دینار دروست دەکرێت، وادەی تەواوکردنی 700 ڕۆژە و توانای کۆگاکردنی 40 هەزار تۆن گەنمی هەیە.