ئەمساڵ زیاتر لە 250 هەزار تۆن بەرهەمی نێوخۆیی هەناردەی دەرەوە کراوە

ئاڤا نیوز

بەگوێرەی ئامارێکی هۆبەی چاودێری گومرگی کشتوکاڵی هەولێر، ئەمساڵ زیاتر لە 250 هەزار تۆن بەرهەمی سەوزە و میوەیان هەناردەی شارەکانی ناوەڕاست و خوارووی عێراق کردووە.

وێنە گەورەکە: کابینەی نۆیەمی حکومەتی هەرێمی کوردستان لەگەڵ دەستبەکاربوونی، سیاسەتی زیادکردنی بەرهەمی نێوخۆیی و بەرزکردنەوەی ئاستی هەناردەکردنی گرتووەتەبەر.

لێدوانی فەرمی: هێمن سەید موراد، بەڕێوەبەری گشتی کشتوکاڵی هەولێر بە ئاڤا نیوزی ڕاگەیاند: ئەمساڵ قەبارەی هەناردەکردنی بەرهەمی ناوخۆیی بەراورد بە ساڵی ڕابردوو بۆ دوو هێندە بەرز بووەتەوە.

زانیاریی زیاتر: لە شەش مانگی یەکەمی ئەمساڵ 15 هەزار و 500 پشتگیری بە جووتیاران دراوە، ئەمەش هاوتای 250 هەزار تۆنە، بەرهەمەکان پەتاتە، پیاز، شووتی، کاڵەک، تەماتە و زۆربەی سەوزەکان بوون، بۆ شارەکانی ناوەڕاست و خوارووی عێراق هەناردەکراون. هێمن سەید موراد وای گوت.

ئەوەی پێویستە بیزانیت: هەر جووتیارێکی هەرێمی کوردستان ئەگەر بیەوێت بەرهەمەکەی بۆ شارەکانی ناوەڕاست و خوارووی عێراق ببات، پێویستە لە هۆبەی چاودێری گومرگی کشتوکاڵی هەولێر پسوڵەی بۆ بکرێت.