ئامادەکاری بۆ پێشوازیکردن لە زیارەتکارانی چلەی ئیمام حسێن دەکرێت

ئاڤا نیوز

بۆ سێیەمین ساڵ لەسەر یەک زیارەتکارانی ئێران و بەشێک لە وڵاتانی دیکە، لە ڕێگەی دەروازەی سنووریی حاجی ئۆمەرانەوە دەگەنە هەولێر و لەوێشەوە بەرەو کەربەلا دەچن، ئامادەکاری بۆ پێشوازیکردن لە زیاتر لە 500 هەزار زیارەتکار دەکرێت.

وێنە گەورەکە: ساڵانە نزیکەی ملیۆنێک زیارەتکاری ئێرانی  بۆ به‌شداریكردن له‌ چله‌ی ئیمام حوسێن لە ڕێی دەروازە سنوورییەکانەوە دێنە نێو  هەرێمی کوردستان و دەگوازرێنەوە نەجەف و کەربەلا، بۆ ئه‌و مه‌به‌سته‌ش حكومه‌تی هه‌رێمی كوردستان به‌ر له‌ گه‌یشتنی زیاره‌تكاران ئاماده‌كارییەکانی دەست پێدەکات.

لێدوانی فەرمی: سیروان حسێن، گوتەبێژی دەروازەی نێودەوڵەتی حاجی ئۆمەران بە ئاڤا نیوزی گوت: "لیژنەیەک بۆ سەرپەرشتیکردنی پرۆسەی پێشوازیکردن لە زیارەتکاران پێکدەهێنرێت، بڕیار لەسەر پڕۆگرامی ئەمساڵ بۆ پێشوازیکردن لەو زیارەتکارانە دەدرێت".

ئەوەی پێویستە بیزانیت: زیارەتکاران لە پێنجی مانگی داهاتوو دەست بە جوڵە دەکەن و بۆ ماوەی 10 ڕۆژ دەمێننەوە.