20 سانتیمەتر بەفر باریوە و جوڵەی بازرگانیش بەردەوامە

ئاڤا نیوز

شەپۆلێکی بەفربارین ناوچە شاخاوییەکانی هەرێمی کوردستانی گرتووەتەوە، لە بەشێکی ناوچە سنوورییەکاندا زیاتر لە 20 سانتیمەتر بەفر باریوە و ڕێگەکان دانەخراون، بەڵام بەهۆی دابەزینی پلەکانی گەرما بۆ ژێر پلەی سفر بەستن و شەختە دروست دەبێت و دەبێتە هۆی ئاستەنگی هاتووچۆ.

 

وێنەگەورەکە: بەشێک لە دەروازە سنوورییەکانی هەرێمی کوردستان زۆرجار لەگەڵ هاتنی شەپۆلی بەفر و باران دادەخرێن و ئاستەنگ بۆ جموجۆڵی بازرگانی دروست دەبێت، هاموشۆی گەشتیاریش سست دەکەن.

 

لێدوانی فەرمی: سیروان محەممەد، وتەبێژی دەروازەی نێودەوڵەتی حاجی ئۆمەران بە ئاڤا نیوزی گوت، "20 سانتیمەتر بەفر باریوە و لەلایەن تیمەکانی فریاگوزاری پاککراونەتەوە، بەڵام پلەکانی گەرما بەشێوەیەکی بەرچاو دابەزیون و پێویستە شۆفێران پابەندی ڕێنماییەکانی هاتوچۆبن".

 

زانیاریی زیاتر: ئاڤا بەدواداچوونی لە دەروازەکانی ئیبراهیم خەلیل، باشماخ و پەروێزخان کرد و لەسەرجەمیان جموجۆڵی گەشتیاریی ئاساییە، تەنیا لە باشماخ کە دەکەوێتە سنووری پێنجوێن دوو سانتیمەتر بەفر باریوە ئەوەش کاریگەری نەبووە.