ئەم مانگە زەیت لەگەڵ بەشەخۆراکی مانگانە دابەش دەکرێت

ئاڤا نیوز 

 

ئەم مانگە لەگەڵ بەشەخۆراکی مانگانە زەیت دابەش دەکرێت و بریکارەکانی خۆراک ئاگادار کراونەتەوە، لیستی بریكاری خـۆراک  وەربگرن و پارەی لیستی بریكاری پێشكەش بکەن. 

 

وێنە گەورەکە: لە ماوەی ڕابردوو دوو سەلەی بەشەخۆراکی مانگانە دابەشکراوە بەبێ زەیت، کە بەهۆی کێشەیەکی تەکنیکی زەیت لەسەرجەم عێراق دابەشنەکرا و دواکەوت، ئێستا کێشەکە چارەسەر کراوە و ڕێژەیەکی زۆر زەیت گەیشتووەتە هەرێمی کوردستان.

 

لێدوانی فەرمی: دلێر عەبدولواحید، بەڕێوەبەری بازرگانی و كەلوپەلی خۆراكی هەولێر، بە ئاڤا میدیای ڕاگەیاند، بریکارەکانی خۆراک ئاگادار کراونەتەوە کە سبەی پێنجشەممە سەردانی بەڕێوەبەرایەتیی بازرگانی خۆراکی هەولێر بکەن، بۆ وەرگرتنەوەی  لیستی بریكاری خـۆراک و پێشكەشكردنی پارەی لیستی بریكاری.

ئەوەی پێویستە بیزانیت: لەبارەی ئەو ماددانەی بڕیاروایە دابەش بکرێت کە پێكهاتووە لە، زەیت و شەكر و برنج و نیسك و لەتکەنۆک و نۆك و دۆشاوی تەماتە.

 

ئەوەش بزانە: ئەو بریكارانەی تائێستا ناسنامەی بریكارییان وەرنەگرتووەتەوە، دەبێت بڕی 16,000 دینار زیاتر داخلی ڤیزەكارد بكەن بۆ وەرگرتنەوەی ناسنامەی بریكاری ساڵی 2025، بۆ وەرگرتنەوەی لیستی بریكاری خۆراك و شێوازی پارەدان، دەبێ ڤیزەكاردی بانكی (جنوب ئیسلامی) هەبێت.