ڕووداوێکی هاتووچۆ لە شێخان شەش بریندار و گیانلەدەستدانێکی لێکەوتەوە

‎ئاڤا نیوز

ئەمشەو لە قەزای شێخان، لە ڕۆژهەڵاتی پارێزگای دهۆک بەهۆی ڕووداوێکی هاتووچۆ شەش کەس بریندار بوون و کەسێکیش گیانی لەدەستدا، لەو ژمارەیەدا چوار کەس بە ڕەچەڵەک عەرەبن.

زانیاریی تایبەت: سەرچاوەیەک لە هێزە ئەمنییەکانی قەزای شێخان بە ئاڤا نیوزی ڕاگەیاند، ئەمشەو لە ناحیەی زێلکانی سەر بە قەزای شێخان لە ڕووداوێکی هاتووچۆدا دوو ئۆتۆمبێل پێکیاندادا، یەکێک لە شۆفێرەکان کورد بووە و ئەوەی دیکەیان عەرەب بووە. لە ئەنجامدا یەکێک لە سەرنشینەکان لە تەمەنی 35 ساڵیدا کە بە ڕەچەڵەک عەرەب بوو، گیانی لەدەستدا.

ئەو سەرچاوەیە ئاماژەی بەوەش کرد، سێ هاووڵاتی دیکەی عەرەب و سێ هاووڵاتی کورد لە ڕووداوەکەدا بریندار بوون.

زانیاریی زیاتر: سێ هاووڵاتییە کوردەکە، خەڵکی قەزای شێخانن کە ڕەوشی تەندروستی دووانیان خراپە. هەروەها تەواوی بریندارەکان ئێستا ڕەوانەی نەخۆشخانەی دهۆک کراون.