لە سنووری چیای قەرەچووغ ڕاوە مامز دەکرێت

ئاڤا نیوز

بەپێی یاسا ڕاوکردنی ئاژەڵی کێوی لە هەرێمی کوردستان قەدەغەیە و هەر کەسێکیش سەرپێچی بکات ڕێکاری یاسایی لەبەرامبەدا دەگیرێتەبەر، بەڵام هەندێک کەس بە سوود وەرگرتن لە بۆشایی ئەمنیی نێوان هێزەکانی پێشمەرگە و سوپای عێراق، ئاژەڵی کێوی لە سنووری چیای قەرەچووغ ڕاو دەکەن. 

 

چیرۆکی سەرەکی: بەهۆی ئەوەی ماوەیەکە دیاردەی ڕاوکردنی ئاژەڵی کێوی لە سنووری قەرەچووغ و گوندەکانی دەورووبەری زیادی کردووە، چالاکوانانی ناوچەکە داوا دەکەن دەسەڵاتداران و لایەنە پەیوەندیدارەکان ڕێگری لەو کارە بکەن. 

 

لێدوانی فەرمی: چالاکوانێکی بواری ژینگە لە سنووری قەزای مەخموور بە ئاڤای ڕاگەیاند، نزیکە ساڵێکە چەند کەسێک لە سنووری قەراج و مەخموور، گوندی عەلیە ڕەش و قەڵاتە سۆران، لە بناری چیای قەرەچووغ، خەریکی ڕاوە مامزن بە چەکی قورس و سووک "بیکەیسی و قەناس"، بەشێک لە خەڵکی ناوچەکەش چاوساغیان بۆ دەکەن، چونکە ئەو شوێنە ناوچەیەکی قەدەغە کراوە لە نێوان سوپای عێراق و هێزی پێشمەرگە. 

 

زانیاریی زیاتر: ئەو سەرچاوەیە باسی لەوەشکردووە، ئەو ئۆتۆمبێلەی کە بەکاردێت هەڵگری تابلۆیەکی ڕەنگ شینی حکومەتی عێراق، بەڵام نازانرێت کە هی کام وەزارەتە. 

 

لەلایەکی دیکەوە: عمید فەرمان فازل، بەڕێوەبەری پۆلیسی دارستان و ژینگەی هەولێر، بە ئاڤا میدیای ڕاگەیاند، هەفتەی ڕابردوو کەسێکمان دەستگیر کردووە لەسەر ڕاوکردنی مامز و دەستمان بەسەر سێ بێچووە مامزدا گرتووە، دەمانەوێت بیان گێڕێنەوە ناو سرووشت، تۆمەتبارەکەش ڕێکاری یاسایی بەرامبەر دەگیرێتەبەر، بەڵام ئەو ناوچانەی دیکە لە سنووری دەسەڵاتی ئێمە نین. 

-    ڕزگار محەممەد، قایمقامی قەزای مەخموور، بە ئاڤا میدیای ڕاگەیاند، زانیاریمان هەیە ئەو کەسانەی کە ڕاوە مامز دەکەن کەسانی سەربازین، لە هەوڵی ئەوەشداین کە بتوانین ڕێگری لە دووبارەبوونەوەی ئەو حاڵەتە بکەین و ئەو کەسانە ڕووبەڕووی دادگا بکەینەوە.