تورکیا ڕێژەی بەردانەوەی ئاو بۆ عێراق زیاد دەکات

ئاڤا نیوز

وەزارەتی سەرچاوەکانی ئاوی عێراق ئاشکرایکرد، تورکیا 200 مەتر سێجا ئاو لە چرکەیەکدا بەرەو ڕووباری دیجلە بۆ نێو خاکی عێراق بەردەداتەوە.

وێنە گەورەکە: ئەم هەنگاوەی تورکیا بۆ بەردانەوەی ئاو، دوای سەردانەکەی شاندی عێراق ڕۆژی سێشەممە 2025-07-01 بۆ ئەنقەرە و پەیوەندییە تەلەفۆنییەکەی نێوان محەمەد شیاع سوودانی، سەرۆکوەزیرانی عێراق و ڕەجەب تەیب ئەردۆغان، سەرۆکی تورکیا هات، ئەردۆغان بەڵێنی دا 420 مەتر سێجا ئاو لە چرکەیەکدا بەرەو ڕووبارەکانی دیجلە و فورات بەربداتەوە.

 

لێدوانی فەرمی: خالید شەمال، وتەبێژی وەزارەتی سەرچاوەکانی ئاو، ڕایگەیاند:  تورکیا دەستی کردووە بە بەردانەوەی 200 مەتر سێجا ئاو لە چرکەیەکدا بەرەو ڕووباری دیجلە بۆ نێو خاکی عێراق و پێشبینیش دەکرێت بڕی ئاوەکە لە ڕۆژانی داهاتوودا بۆ 420 مەتر سێجا لە چرکەیەکدا زیاد بکرێت. 

زانیاریی زیاتر: شەمال ئاماژەی بەوەش کرد، کاریگەریی ئەو ئاوەی کە ئێستا دێت، بەشێوەیەکی ڕاستەوخۆ دەرنەکەوتووە بەهۆی خێرایی ڕۆیشتنی کە لە نێوان 50 بۆ 60 کیلۆمەتر لە کاتژمێرێکدایە.

 

ئەوەی پێویستە بیزانیت: ماوەی چەند ساڵێکە عێراق ڕووبەڕووی قەیرانی ئاو بووەتەوە، ئەمەش دوای ئەوەی تورکیا لەسەر سەرچاوەکانی هەردوو  ڕووباری دیجلە و فورات چەندین بەنداوی دروست کردووە، هاوکات بە مەبەست رێککەوتنێکی دوو قۆڵی لەبارەی پرسی ئاو گفتوگۆکانی نێوان عێراق و تورکیا ساڵانێکە بەردەوامە.