عێراق لە 62 ترلیۆن دینار داهات، پێنج ترلیۆنی بۆ هەرێمی کوردستان خەرجکردووە و 319 ملیار دیناری لێ وەرگرتووە

ئاڤا نیوز

بەپێی ڕاپۆرتی فەرمیی وەزارەتی دارایی عێراق سەبارەت بە داهات و خەرجییەکانی شەش مانگی یەکەمی ساڵی 2025، کۆی داهاتەکانی دەوڵەت گەیشتووەتە 62 ترلیۆن دینار، کە 92%ـی ئەم داهاتە لەسەر نەوت بووە. لە هەمان ماوەدا، زیاتر لە 5 ترلیۆن دینار بۆ هەرێمی کوردستان خەرج کراوە و لە بەرامبەردا بڕی 319 ملیار دینار وەک داهاتی نانەوتی لە هەولێرەوە ڕادەستی بەغدا کراوە.

بڵاوکراوەی فەرمی: وەزارەتی دارایی فیدراڵیی عێراق ئەو داتا و خشتانەی بڵاوکردنەوە کە تایبەتن بە حیساباتی دارایی نیوەی یەکەمی ئەمساڵ.

ژمارەکان وادەڵێن: بەپێی خشتەکانی داهات، داهاتەکان بەم شێوەیە بوون:

٠ کۆی گشتیی داهات: 62 ترلیۆن و 3 ملیار و 937 ملیۆن دینار بووە

٠ داهاتی نەوت: 57 ترلیۆن و 52 ملیار و 854 ملیۆن دینار بووە

٠ داهاتی نانەوتی: 4 ترلیۆن و 951 ملیار و 282 ملیۆن دینار بووە

ئەم ژمارانە دەریدەخەن کە بودجەی عێراق بە ڕێژەی 92% پشتی بە داهاتی نەوت بەستووە و تەنها 8%ـی لە سەرچاوەی دیکەی وەک باج و ڕسوماتەوە بووە.

خەرجیی مووچە: لەکۆی گشتیی داهاتەکان، بەشێکی زۆر بۆ مووچەی فەرمانبەران و خەرجییە کۆمەڵایەتییەکان ڕۆیشتووە، بڕی 30 ترلیۆن و 25 ملیار 45 ملیۆن دینار بۆ مووچەی فەرمانبەران خەرجکراوە. ئەمەش واتای ئەوەیە کە نزیکەی 48%ـی کۆی داهاتی شەش مانگی یەکەمی دەوڵەت تەنیا بۆ مووچەی فەرمانبەران خەرج کراوە.

پشکی هەرێمی کوردستان: ڕاپۆرتەکە بە ڕوونی ئاماژەی بەو بڕە پارانە کردووە کە بۆ هەرێمی کوردستان خەرج کراون و ئەو داهاتانەی لێی وەرگیراون:

٠ پارەی خەرجکراو بۆ هەرێمی کوردستان: لە خشتەی خەرجییە گشتییەکاندا کۆی گشتیی خەرجی بریتی بووە لە 5 ترلیۆن و 166 ملیار و 760 ملیۆن دینار.

٠ داهاتی وەرگیراو لە هەرێمی کوردستان: لە بەشی داهاتەکان، بە ڕوونی ئاماژە بەوە کراوە کە "داهاتە نانەوتییەکان کە لە هەرێمی کوردستانەوە ڕادەستی گەنجینەی دەوڵەت کراوە" بڕەکەی 319 ملیار و 346 ملیۆن دینار بووە.

ئەوەی پێویستە بیزانیت: داتاکان دەریدەخەن کە ئابووریی عێراق هێشتا بە ڕێژەیەکی زۆر پشتبەستووە بە نەوت. لەکاتێکدا حکومەتی فیدراڵی لە شەش مانگدا زیاتر لە 5 ترلیۆن دیناری وەک خەرجی بۆ هەرێمی کوردستان تۆمار کردووە، لە بەرامبەردا بڕی 319 ملیار دیناری وەک داهاتی نانەوتی لە هەولێرەوە بە فەرمی وەرگرتووە.